Tant per Giuliana Werro sco er per Anja Lozza è quai in mument tut aparti e franc in dals puncts culminants da la carriera. Per l’emprima giada dastgan ellas sa mesirar cun l’elita mundiala da passlung. L’emprima finamira è da rimnar bleras experientschas e da propi fufragnar ina giada en quest mund d’elita. Il resultat na gioga uschia betg la rolla centrala. E tuttina emprovan omaduas da nizzegiar quella schanza e da mussar la meglra cursa pussibla al pe dal Flüela, sin quella loipa nua ch’ils Svizzers treneschan la gronda part.
Fans ed amis ston persequitar la cursa a la televisiun
Displaschaivlamain croda il debut en la cuppa mundiala gist en la crisa da corona. Uschia na pon las duas Engiadinaisas betg parter quest mument spezial cun lur famiglia, fans ed amis. Las cursas da Tavau Nordic vegnan numnadamain manadas atras quest onn senza fans ed aspectaturs pervia da la critica situaziun da corona. Ord quest motiv n’han er tut ils passlunghists scandinavs betg fatg il viadi a Tavau. Il bun, la schanza d’uschia cuntanscher in bun resultat en l’emprima cursa da la cuppa mundiala è dada per Giuliana Werro ed Anja Lozza.