Siglir tar il cuntegn

Header

Navigaziun

Ornella Poltéra
Legenda: Ornella Poltéra: victura dals 100 km da Bienna. RTR, Andreas Wieland
cuntegn

Regiunal Ornella Poltéra gudogna ils 100 km da Bienna

La Grischuna Ornella Poltéra è la pli sperta curridra svizra da distanzas ultralungas. La sportista da 26 onns che viva a Domat ha gudagnà cun in grond avantatg ils 100 kilometers da Bienna ed uschia era il titel da campiunessa svizra da distanza lunga.

In onn suenter ch'ella era currida per l'emprima giada ils 100 kilometers da Bienna è Ornella Poltéra gia sisum il podest. A sia premiera era ella vegnida segunda, uonn ha la sportista da 26 onns gia decidì baud la cursa ultralunga. Poltéra è currida bun trais quartas da la cursa persula a la testa.

Gudagnà cun grond avantatg

Ornella Poltéra è currida ils 100 kilometers en 8 uras 27 minutas e 44 secundas ed è stada varga 21 minutas pli sperta che la segunda Mariane Okle. Quai munta che l'anteriura passlunghista ha gì ina media da circa 12 kilometers l'ura. Poltéra è currida quasi l'entira cursa durant la notg. La partenza a Bienna è stada il venderdi saira allas 22:00 uras, arrivada è ella la damaun marvegl curt avant las 6:30 uras.

Victur dals umens è Rolf Thalinger. Il currider ch’ha gia 48 onns ha duvrà 7 uras 28 minutas e 41 secundas.

RR novitads 11:00