La stagiun 2016/2017 è propi stà in stagiun stupenta per Nevin Galmarini d'Ardez. Il snowboardist grischun ha festivà questa stagiun si'emprima plazza da podest en la cuppa mundiala, ultra da quai ha el gì ulteriuras 5 plazzas da top diesch en la cuppa mundiala da snowboard. E lura vegn anc vitiers che Galmarini ha gudagnà tar il champiunadi mundial en la Sierra Nevada la medaglia da bronz en sia disciplina da parada, il slalom gigant parallel.
La sumbriva da la medaglia da Sotchi
La davosa stagiun è propi stà ina stagiun stupenta. La meglra insumma en l’entira carriera dal snowboardist ch'era turnà dals gieus olimpics a Sotchi l’onn 2014 cun la medaglia d'argient. La stagiun gist suenter il grond success era fitg difficila, ed era l'onn suenter n'ha Galmarini betg pudì mussar sia meglra prestaziun. Pir ussa, trais stagiuns suenter il grond success, èsi reussì a Galmarini da propi mussar quai ch'el sa. Ed uschia duessi sa chapescha cuntinuar. Il proxim enviern spetgan ils proxims gieus olimpics e là vul Galmarini danovamain cumbatter per medaglias.