L'EHC Cuira maina en la seria dals quartfinals cunter Langenthal cun 2:1 – e dovra mo anc ina victoria per cuntanscher ils mezfinals. La gievgia saira ha Cuira decidì la partida cunter Langenthal gist cun 10:0.
Ils emprims dus gols ha Cuira marcà aifer paucas secundas, en la 10avla minuta da la partida. En il segund terz èn suandads trais ulteriurs gols al resultat intermediar da 5:0. La producziun da gols ha vinavant funcziunà bain tar Cuira, uschia che la partida è ida a fin cun in 10:0. Il meglier marcader è stà Daniel Carbis cun trais gols.
Uschia ha l'EHC Cuira mussà ina ferma reacziun, suenter la terrada da 2:4 il mardi. L'emprima partida da quest playoff quartfinal avevan ils da Cuira gudagnà cun 5:0. Uss po Cuira gia decider la seria da best-of-5 la sonda, cura ch'i va ordaifer cunter Langenthal. Gudognan ils Grischuns la seria – èsi fix ch'els dumognan la promoziun en la Swiss League, la segund auta liga svizra. Il motiv è che nagin'autra squadra n'ha fatg la dumonda da licenza per la Swiss League.
Emprima victoria per Arosa
En il terz duel da l'EHC Arosa cunter Seewen en ils playoff quartfinals è gartegià als Grischuns l'emprima victoria, cun il 3:2 suenter prolungaziun ordaifer. Duvrà han els dentant la prolungaziun – suenter il temp regular era la partida numnadamain pari 2:2. L'emprim ha Arosa perfin manà cun dus gols, sajettads aifer 13 secundas en l'emprim terz. Seewen è dentant returnà en las emprimas minutas dal davos terz. Il gol decisiv al 3:2 è lura crudà en la 72avla minuta da la prolungaziun.
Las duas emprimas partidas ha Arosa mintgamai gì pers. L'emprim ordaifer cun 2:3, e lura a chasa cun 1:4. La sonda han ils d'Arosa la schanza d'egualisar la seria da best-of-5. Quai è era necessari per evitar la fin da la stagiun.