Il sport ha adina gì ina gronda muntada en la vita da Sascha Deplazes ch’è maridà e bab da dus uffants. La stad lavura el sco chauffeur da camiun tar ina firma da bajegiar, l’enviern prepara el skis tar ina fatschenta da sport. Sper sia lavur è Sascha Deplazes per la gronda part vid il trenar – stad ed enviern.
Regularmain sin il podest
La pajaglia per ses trenament èn la finala ils buns resultats. Sascha Deplazes è tranter auter er gia currì il maraton da skis engiadinais en bun in’ura e mesa ed uschia stà tranter ils top 100. Anc ina meglra figura fa el dentant en las cursas da mountainbike, nua ch’el cuntanscha regularmain plazs da podest en sia categoria dals umens.
En las trais cursas dal Swiss Bike Cup en questa stagiun è Deplazes adina stà sin il podest. La trais cursas dal Bike Cup da la Svizra Orientala ha el schizunt gudagnà. Sascha Deplazes tutga en mintga cas tranter in dals megliers mountainbikers svizzers da las annadas settanta.
Partenza al Swiss Epic
Sia proxima finamira è il Swiss Epic, ina cursa da pliras etappas che maina quest onn per l’emprima giada tras il Grischun. Il Swiss Epic ch’è la fin d'avust vala sco ina da las pli diras cursas da mountainbike insumma. A la partenza van mintgamai teams da dus.
RR Sportissimo 17:00