La stagiun da quest onn è ina senza grondas festas sco la festa federala, quella da l’Unspunnen ni la festa da lutga da Kilchbert. Tuttina datti intgins puncts culminants per ils lutgaders grischuns, per exempel la festa da la Svizra dal nordost la fin da zercladur u la festa grischuna-glarunaisa mez fanadur a Schiers.
Tenor il manader tecnic dals lutgaders grischuns Reto Attenhofer èn ils ferms lutgaders sco Beat Clopath u ils frars Orlik sa preparads bain sin la nova stagiun ed el spetga ina buna prestaziun dad els a Fläsch.
Lutga da primavaira a Fläsch
Varga 80 lutgaders dal Grischun, da l’Appenzell, da Son Gagl, Glaruna, Turgovia e Turitg cumbattan dumengia a Fläsch a la lutga da primavaira. Ils davos onns han adina grischuns gudagnà quella lutga, per exempel Beat Clopath, Edi Philipp e Stefan Fausch. Ferton che Philipp e Fausch han terminà lur carriera s'auda Beat Clopath er quest onn tar ils favurits.
Sportissimo 17:30