Ina gronda cursa populara da passlung en stil classic è "La Diagonela". Quest onn han ils organisaturs stuì cumbatter cun la mancanza da naiv. Tenor ils organisaturs è la cursa dentant segirada e po vegnir fatga.
Ella vegn manada atras sin in traject da 15 kilometers e maina da Zuoz sur Madulain a La Punt Chamues-ch ed enavos a Zuoz. Quest traject fan ils curridurs 3 giadas. Cun quai è la cursa radund 40 kilometers ed uschia pli curta che l'originala cun 65 kilometers.
Investì dapli forzas e raps
Per garantir la cursa sin il traject adattà han ins stui manar natiers parzialmain naiv artifiuziala. Quai surtut là nua ch'igl ha dà ina vetta da glatsch sin la loipa. Radund 2'000 meters cubic naiv artifiziala sa chattan sin ils 15 kilometers. Las lavurs da smatgar en la naiv natirala en la loipa custan supplementarmain 10'000 enfin 15'000 francs. Quai tar in preventiv d'in mez milliun francs.
Dapi il 2013 datti "La Diagonela" cun partenza ed arrivada a Zuoz. Igl è ina cursa che fa part a la seria internaziunala "Ski classics" cun il Vasaloppet, la Marcialonga ed autras cursas da renum.
Ils organisaturs spetgan 800 curridurs.
Arrivada amez vischnanca
L'attracziun da l'ediziun da quest onn è che l’arrivada da la cursa è amez la vischnanca da Zuoz. Ils organisaturs han serrà la via tras il center da Zuoz per il traffic e transportà cun camiuns naiv amez vischnanca.
Plazza da podest per Seraina Boner
Plaz da podest per Seraina Boner da Claustra en la segunda ediziun da La Diagonela a Zuoz. Boner è vegnida terza en la cursa da 43 kilometers en stil classic.Gudagnà ha la Giapunaisa Masako Ishida avant l’Austriaca Katerina Smutna.
Ils resultats dals umens
Gudagnà tar ils umens ha in prominent: Il Norvegiais Öysten Pettersen, il campiun olimpic en il sprint d’equipa dal 2010, quai avant ses cumpatriots Callesen Kristoffer e Jon Kristian Dahl.