Siglir tar il cuntegn

Header

cuntegn

Regiunal Kreienbühl gudogna cursa da primavaira

Il victur da la 33avla cursa grischuna da primavaira ha num Christian Kreienbühl. Il favurit ha triumfà sur la distanza da mez maraton da Tusaun fin a Rehanau/La Punt en in nov temp da record.

Il currider da 37 onns ch‘è gia stà campiun svizzer en il maraton e ch‘è er stà a la partenza als gieus olimpics il 2016 a Rio de Janeiro ha duvrà per ils 21,1 kilometers 1:10.47 uras. Christian Kreienbühl è uschia stà bun 3 minutas pli spert ch‘il record da l‘onn 2017.

audio
Saira: Christian Kreienbühl – il victur da la cursa da primavaira
ord Sportissimo dals 07.04.2019.
laschar ir. Durada: 3 minutas 56 Secundas.

Segund è vegnì tar l‘ediziun 2019 Max Knier da San Murezzan (1:12.03) che aveva gudagnà ils davos dus onns questa cursa populara. Terz è daventà Ulisses Joos da Cuira (1:13.12 uras).

Nina Zoller è la pli sperta dunna

Tar las dunnas ha Nina Zoller da Cuira gudagnà sur la distanza da 21 kilometer en in temp da 1:23.05 uras, quai avant Veronika Schanzer da Herisaun (1:24.31 uras) e Céline Cébe dad Unterlunkhofen (1:32.18 uras).

Ils victurs da la cursa curta sur 10 kilometers da Giuvaulta a Rehanau èn Sandro Michael da Ziraun (36.21.7 minutas) tar ils umens e Lea Hohbach da Jenaz (45.13.9 minutas) tar las dunnas.

RR novitads 14:00

Artitgels legids il pli savens