Siglir tar il cuntegn

Header

cuntegn

Regiunal Ina cursa da currer sco lavur da matura

La gimnasiasta Svenja Ammann da Tarasp organisescha sco lavur da matura la cursa da currer «Tras Scuol».

La gronda passiun da Svenja Ammann da Tarasp è il sport da currer. Dapi in pèr onns e quai il hobi da la gimnasiasta da 17 onns ed ella sa participescha era regularmain a cursas da currer. L’enviern fa Svenja Ammann passlung.

Sia lavur da matura: Organisar ina cursa

En la discussiun davart in pussaivel tema per la lavur da matura è bainspert naschì il giavisch tar Svenja Ammann dad empruvar dad organisar ina cursa da currer. Fascinada da la cursa da stad a Scuol, a la quala ella ha fatg part avant quatter onns per l’emprima giada, ha ella cumenzà dad organisar sezza ina cursa. Ina cursa da set, respectiv da trais kilometers e mez atras Scuol. La cursa «Tras Scuol» è alura era il num da la lavur da matura che Svenja Ammann ha fatg.

Dapli che mo fixar il termin da la cursa

Per che la cursa gartegia dovri dapli che mo il termin per la cursa. Avant che Svenja Ammann ha insumma pudì cumenzar cun l’organisaziun da la cursa, ha ella stuì avair differents permiss. Ella ha per exempel stuì dumandar la vischnanca da Scuol per lubientscha. Alura è ella ida a la tschertga da sponsurs, dad insatgi che mesira il temp e per finir anc per voluntaris che gidan sin il traject sco era en l’ustaria da festa.

Cursa cun in bun intent

Il gudogn da la cursa che ha lieu ils 8 da zercladur a Scuol va a favur da la fundaziun Svizra per il cor. La fundaziun s’engascha cunter malsognas dal cor e da las avainas.

RR Sportissimo 17:00