Siglir tar il cuntegn

Regiunal Ils dus rivals en la miseria sportiva

Il CB Trun/Rabius e l'US Danis-Tavanasa, quai n’èn betg mo dus rivals, mabain er dus clubs vischins a l’ur dal Rain, dus clubs da ballape da tradiziun che ston tremblar da betg ir da l’aua giu.

logo da CB Trun/Rabius ed US Danis-Tavanasa
Legenda: Nua rolla la balla en l’avegnir per il CB Trun/Rabius e l’US Danis-Tavanasa? RTR

Avant dus onns regiva anc in’euforia da ballape tar ils dus rivals, il CB Trun/Rabius e l’US Danis-Tavanasa. Omadus clubs han cumbattì durant la stagiun 2013/2014 enfin il pli davos per la promoziun en terza liga. La finala han ils da Trun/Rabius gudagnà quai cumbat ed els han astgà far il pass en in liga pli auta.

Ussa, dus onns pli tard, cumbattan omadus clubs puspè en quarta liga e ston tremblar da betg vegnir relegads en la 5avla liga, la pli bassa liga insumma en Svizra.

Ins sto propi laschar adatg ch’ins na perdia betg la gnerva.
Autur: Otto Beerpresident CB Trun/Rabius

Sportivamain na va tant sco nagut tar ils dus clubs da la Cadi. Omadus clubs han pers gieus en seria durant questa stagiun. Tar Trun/Rabius manchia il mument era in zic il cletg di il president dal club, Otto Beer. Tar ils da Danis-Tavanasa manchia plinavant la qualitad, uschia il president Marcus Brunner.

Trenader nagin tema, però fusiun

Nagin tema, quai tar omadus clubs, è il trenader. Auter che tar ils gronds clubs na stoppian ils trenaders betg temair per lur post.

Sch’ins vesa ch’i va vinavant uschia sche na datti nagut auter che da far insatge, uschiglio van empaglia omadus clubs ed il davos resta nagut.
Autur: Marcus Brunnerpresident US Danis-Tavanasa

L’avegnir dals dus clubs è intschert. I manca er ils giuvens, ils juniors. E sch’i nascha in u l’auter bun giugader è la ristga gronda che quel banduna il club vers Schluein Glion u va schizunt fin a Cuira. Ina pussaivladad da salvar almain in club avant che laschar ir omadus a frusta è da fusiunar. Quai saja in tema da prender serius dian ils dus presidents Otto Beer da Trun/Rabius e Marcus Brunner da Danis-Tavanasa.

Proxim derbi 12-06-2016

Almain in derbi datti segir anc. En la davosa runda da campiunadi en quarta liga frunta mez zercladur l'US Danis-Tavanasa sin il CB Trun-Rabius. Omadus clubs speran da pudair cumbatter en quest davos gieu per in plaz amez la tabella e betg encunter la relegaziun.


Avant 3 onns era tar l'US Danis-Tavanasa tut anc en urden…

Legende: Video 70 onns US Danis-Tavanasa abspielen. Laufzeit 3:16 Minuten.
Dals 17.06.2013.