En Svizra han ils Calanda Broncos strusch pli concurrents. Cun otg titels èn ils Broncos campiuns svizzers da record egl american football. Ils defensurs dal titel domineschan era quest onn. 7 gieus, 7 victorias è la bilantscha actuala. Per avair concurrents da vaglia ston ils Calanda Broncos dar sin livel internaziunal. En la European Football League sa mesiran ils Broncos cun ina ferma equipa tudestga, e quai era anc ordaifer. En l’emprim gieu da gruppa han ils Calanda Broncos battì ils Brüssel Tigers cun 39:0. Dumengia dat l’equipa grischuna en Germania encunter ils Potsdam Royals.
Ils tudestgs valan sco favurits
Sco gia ils Calanda Broncos han era ils Potsdam Royals fatg curtas cun l’emprim adversari en ils gieus da gruppa da la European Football League. Potsdam ha battì l’equipa da la Belgia gist cun 72:0. Uss decida en il gieu direct tranter ils Potsdam Royals ed ils Calanda Broncos tgi che vegn en il final. Per il giugader grischun Michel Derungs èn ils tudestgs ils favurits. Ma ils Broncos hajan studegià videos da l’adversari e sajan era uschiglio sa preparà bain sin quai gieu decisiv che è dumengia a las 14:00 a Potsdam.
RR sportissimo 17:00