Siglir tar il cuntegn
Inhalt

Regiunal Il pli grond eveniment da sport arriva en l'Engiadina

Il Tour de Suisse fa puspè fermada en Engiadina. A La Punt va a fin l’etappa roiala ed a Zernez parta il di suenter la cursa en direcziun Sölden.

velocipedists cun Mathias Frank sco emprim
Legenda: Il Tour de Suisse 2013 a Bravuogn, en direcziun La Punt. Da lezzas uras cun Mathias Frank a la testa. Keystone

La cursa da velo dal Tour de Suisse è il pli grond eveniment da sport en Svizra. Durant nov dis visita l’occurrenza da sport tut las quatter regiuns linguisticas da la Svizra. Il Tour fa era puspè fermativa en l'Engiadina. L’etappa roiala dals 15 da zercladur maina sur 166 kilometers da Locarno sur ils pass dal San Bernardino e da l’Alvra a La Punt. E l’etappa il di suenter cumenza a Zernez e va lura en l'Austria a Sölden.

Gia per la otgavla giada finescha ina etappa dal Tour de Suisse a La Punt. Ils organisaturs dal lieu d’etappa han uschia ina gronda experientscha.

purtret Urs Niederegger
Legenda: Urs Niederegger dal comité d'organisaziun da La Punt, ina da las fermadas dal Tour de Suisse. RTR, Roman Dobler
Nus essan pronts e vain rutina da far quai. Difficil è dentant da chattar novs sponsurs per l'eveniment.
Autur: Urs Niedereggercomité d’organisaziun La Punt

Tant per La Punt sco era per Zernez è la preschientscha mediala da gronda impurtanza. L’effect da reclama è immens. Cun organisar etappas dal Tour vulan omaduas regiuns sa posiziunar anc pli ferm en il sectur da velo da cursa. La Punt conusch’ins gia pervi da las etappas dal Tour de Suisse. Zernez è fin uss enconuschent sco lieu che organisescha il ‘Radmarathon’ il cumenzament da fanadur.

fabian schorta
Legenda: Il coordinatur turistic da Zernez, Fabian Schorta, sa legra sin il Tour de Suisse. RTR, Roman Dobler
Nus ans vulain posiziunar sin il sectur da velo da cursa.
Autur: Fabian Schortacoordinatur turistic Zernez

Il Tour de Suisse arrriva ils 15 ed ils 16 da zercladur a La Punt, respectiv a Zernez.

RR Sportissimo 17:00