Il Nordic House a Lai stat – Avertura tenor plan

Tempo, tempo hai num en l'Arena da biatlon da Lai. 5 mais suenter l’emprima badigliada stat il Nordic House, il grond bajetg multifuncziunal.

Patruns e construiders

Legenda da maletgs: Patruns e construiders Silvio Baselgia, Thomas Rüegg, Michael Hartweg, Pablo Horvath, Enrico Uffer (da senester) RTR, Roger Alig

Il bajetg stat, mo dadens è el anc vid, il Nordic House a l’ur da l'Arena da biatlon a Lantsch. Ina giada finì cumpiglia il bajetg multifuncziunal biros, in bistro, ina fatschenta da sport, gardarobas, ina stanza d'atletica, ina da seminari e pliras chombras da plirs letgs per camps da trenament, en tut 60 letgs. El ha ina cubatura da 9’000 meters cubic, quai correspunda a circa 10 chasas da famiglia.

Laschar ir video «Nordic House a Lantsch»

Nordic House a Lantsch

2:24 min, Telesguard dals 6.9.2016

L'impressari general surdat la clav suenter mo set mais

Construì il Nordic House ha la firma Uffer SA da Savognin sco impressari general. En in temp da record da 7 mais surdat il gestiunari Enrico Uffer las clavs als patruns-chasa. Pussibel saja quai grazia als elements prefabritgads en sia fatschenta. L’edifizi che l’architect da Cuira Pablo Horvath ha planisà saja persistent e correspundia al pli nov stan energetic.

Michael Hartweg è il motor dal project

Il motor da l’entir project è Michael Hartweg. El è il president ed era in grond investur en la societad purtadra, l'Arena da biatlon Lai SA. Hartweg vul dar in stausch al biatlon en Svizra per che quel sa sviluppeschia er tar nus ad in sport impurtant. Sia visiun è d’organisar en intgins onns concurrenzas da la cuppa mundiala u schizunt in campiunadi mundial a Lai.

La naiv è garantida

L’onn passà ha ins testà a Lantsch l’uschenumnada «Snowfactory», in cundriz che lubescha da far naiv era da temperaturas chaudas. Uss vegn quest cundriz installà fix. Uschia èsi garantì d’avair naiv gia l’emprim da november, lura cumenza il manaschi d’enviern.

RR actualitad 17:00