Igl è ina situaziun particulara per il victur da la qualificaziun EHC Cuira. Gia ina victoria en la seria da quartfinal cunter Langenthal tanscha per far il pass en la Swiss League, la segund'auta liga da hockey svizra. Cuira è sin buna via, ed ha gudagnà l'emprim gieu 5:0 cunter Langenthal. Pia mancan anc duas victorias.
Nagin'autra equipa da la Myhockey League ha fatg la dumonda a la federaziun da hockey da far la promoziun. Uschia di il reglament che Cuira sto mo gudagnar ina seria dals playoffs per pudair festivar la promoziun. Roger Lüdi, il schef da sport dal club, ha ditg ch'i saja en mintga cas ina situaziun speziala.
Mo la promoziun na tanscha betg
El di dentant er cler ch'ins veglia betg mo far il pass en la Swiss League cun gudagnar ina seria. Na, la finamira saja da far la promoziun sco campiun da la MyHockey League. Impurtant saja dentant da prender pass per pass, gieu per gieu.
Mintgin dal club è chargià ch'i va liber cun ils playoffs.
Il duel cunter il SC Langenthal è in duel da dus clubs da tradiziun. Langenthal deva fin l'ultima stagiun anc en la Swiss League, ma ha lura voluntariamain or da motivs finanzials, fatg il pass ina liga pli bass. Roger Lüdi sa legra sin quest duel da playoff da las duas equipas cun ils pli blers aspectaturs en la MyHockey League. El spetga duel cun bleras emoziuns.
Segund'equipa grischuna en ils playoffs
Cun Arosa è er anc ina segund'equipa dal Grischun en acziun en ils playoffs da la MyHockey League. Els fruntan en lur seria sin l'EHC Seewen. L'equipa dal Scanvetg ha dentant er naginas ambiziuns da promoziun.
