Il club da hockey da San Murezzan ha manchentà la qualificaziun per la cuppa svizra da hockey da la proxima stagiun. En la davosa partida da qualificaziun ha l’equipa da l’Engiadin'Ota pers encunter Bülach da l'emprima liga superiura cun 2:5. Ditg ha San Murezzan cumbattì per vegnir en il tableau principal da la cuppa da la proxima stagiun. La fin finala dentant senza cletg.
Chastis han fatg la differenza
Incassà dus gols da powerplay e sez betg pudì profitar da las situaziuns numericas. Gnanca cun pudair dar cun tschintg giugaders encunter trais giugaders da Bülach. Quai ha fatg la differenza. La fin ha dentant era mancà il cletg. Fin trais minutas avant la fin era la partida anc egualisada. Lura sajetta Bülach dentant il 3:2. Il 4:2 croda en il gol vid e per finir fa l’equipa da Turitg perfin il 5:2.
Il EHC San Murezzan ha manchentà da far il pass en la cuppa svizra da la proxima stagiun. La proxima schanza d'empruvar da surventscher la qualificaziun ha San Murezzan lura a partir da l’atun per la cuppa svizra da la stagiun 2019/2020.
RR novitads 23:00