L'EHC San Murezzan resta la ferma squadra da hockey in Engiadina. Puspè è l’equipa, che ha gudagnà durant questa stagiun omadus derbis encunter il Cdh Engiadina, en ils playoffs da la segunda liga.
En l’emprima runda da la fasa decisiva dal campiunadi frunta la squadra, che ha stuì integrar durant questa stagiun ina massa giugaders novs, sin Bellinzona. L’emprima partida da la runda da playoff vegn ad esser decisiva, manegia il schef da sport da San Murezzan, Andri Casty:
Entant che San Murezzan è da la partida en ils playoffs è la segunda equipa engiadinaisa da la segunda liga en la runda da relegaziun. La davosa partida da la qualificaziun ha fatg la differenza.
Sin cust dal Cdh Engiadina ha Son Gagl anc fatg il pass en ils playoffs – il Cdh Engiadina ha dad ir en la runda da qualificaziun. Qua dat la squadra dal trenader Benjamin Wunderer las partidas encunter Rapperswil, Lai Valbella e Chiasso. Suenter sis partidas da relegaziun van las duos deblas equipas ina liga pli bass en la terza liga.
Cun nov trenader en runda da relegaziun
Il nov trenader Benjamin Wunderer ha cumenzà la stà passada da lavurar cun il Cdh Engiadina. A la fin da la qualificaziun sa chatta el cun sia equipa en la runda da relegaziun.
Per il Cdh Engiadina vaja per dapli sco mo per segirar la liga. La squadra cumbatta en la runda da relegaziun era per l’existenza en questa segunda liga. Ina relegaziun en ina liga pli bass fiss ina frida per l’equipa da l’Engiadina Bassa.
RTR Sportissimo 17:20+