Gia la stagiun vargada ha il Club da hockey gì da sbatter cun ils medems problems sco uss avant la nova stagiun. L’equipa che dat en la segunda liga ha quasi cronicamain memia paucs giugaders. Perquai ha Lai-Valbella era gì da cumbatter fin l’ultim gieu encunter la relegaziun. Era avant la nova stagiun resta la situaziun precara. A lunga vista duessan dentant avunda agens juniors far il pass en l’emprima equipa.
Promover ils agens juniors è la suletta via
Avant sis onns han il schef da sport Hanueli Salis ed il trenader Ivo Prorok cumenzà lur lavur tar Lai-Valbella. Davent da l’entschatta è lur strategia stada d’intensivar la lavur cun ils juniors. E quai ha purtà fritg. Aveva il club avant sis onns mo pli da quai da 20 juniors èsi uss da quai dad 80. Ivo Prorok ch'è in anteriur giugader naziunal da la Tschechia trenescha sper l’emprima equipa era tut las equipas da juniors. Mo fin che l’equipa da la segunda liga profitescha da sia buna lavur dovri pazienza. Tenor Hanueli Salis dovri quai anc dus fin trais onns fin che avunda dals agens juniors sajan vegls ed era madirs avunda per giugar en la segunda liga.
Transfers na pon betg esser la soluziun
Transfers, vul dir carmalar natiers giugaders d’ordvart pudess bain esser ina soluziun a curta vista conceda Hanueli Salis. Dentant saja quai strusch realistic. Dad ina vart manchian ils daners per transfers, da l’autra vart saja la concurrenza en la regiun simplamain memia gronda. Cuira, Arosa ed uss era Partenz-Signuradi che dettian en ligas pli autas sajan adressas pli attractivas. La strategia da promover ils agens juniors saja perquai l’unica ed era la dretga soluziun.
RR Sportissimo 17:00