Siglir tar il cuntegn
Inhalt

Hockey regiunal L'EHC Cuira ha stuì tremblar per sia victoria

Suenter ina partida plain tensiun po l’EHC Cuira festivar sia segunda victoria da la stagiun. Ils da Cuira han gudagnà cunter Bülach cun 5:4 suenter sajettar penaltis.

Hockey.
Legenda: A la fin hai tuttina tanschì: l'EHC Cuira ha gudagnà a chasa ses segund gieu da la stagiun avant 581 aspectaturas ed aspectaturs. EHC Cuira fans

L'emprim gol da la partida ha sajettà Robin Ganz en la segunda minuta per Bülach. En il segund terz (26avla minuta), ha Patrick Zahner da l'EHC Cuira lura egualisà ad 1:1. En la 36avla minuta ha Cyrill Bischofberger purtà ils Grischuns en avantatg.

L'entschatta dal terz terz ha lura Patrick Zahner purtà l'EHC Cuira al 3:1 cun ses segund gol da la partida. Aurelio Lemm ha lura pudì scursanir sin 3:2. Ils ultims 3 gols dal temp regular han fatg anc ina giada Patrick Zahner per ils da Cuira (56avla minuta) e Aurelio Lemm e Ramón Diem per Bülach.

Cun ils dus penaltis da Cyrill Bischofberger e da Patrick Zahner è la partida lura stada decisa. Suenter set gieus sa chatta la squadra da coach Konstantin Kurashev sin l'11avla e penultima plazza da la tabella da la MSL.

En l'emprima liga ha giugà l'equipa da hockey da Partenz-Signuradi cunter l'SC Herisau. Ils Grischuns han pers ordaifer cun 1:2. Il sulet gol per Partenz-Signuradi ha sajettà Rico Marugg en la 28avla minuta.

L'EHC Arosa percunter ha gudagnà ordaifer cunter ils Red Lions Reinach cun 7:3. Ils gols per Arosa han sajettà Flavio Cola (emprima, 34avla e 55avla minuta), Reto Amstutz (14avla minuta), Patrick Bandiera (18avla e 45avla minuta) e Livio Roner (29avla minuta),

RR novitads 23:00