L’amulain da hockey ha Vanessa Bolinger da Sviz emprais tar Seewen en Svizra Centrala. Da là ha la giuvna da 21 onns fatg il viadi en l’equipa naziunala sut 18 onns e vinavant tar il SC Reinach en liga naziunala A da las dunnas. Suenter ina emprima ferida ha Vanessa Bolinger alura midà tar l’equipa sut 20 onns dal EHC Cuira. En la chapitala grischuna ha il goli pudì festivar ses pli grond success. Cun l'equipa da Cuira è ella vegnida vice-campiunessa Svizra. Il goli vuleva far il proxim pass tar l’equipa dals umens dal EHC Cuira. Or da quel siemi n'è dentant vegnì nagut. Vanessa Bolinger è puspè sa ferida ed il siemi da dar cun ils umens en la MySports League era a fin.
Viadi dal mund e nova entschatta a Scuol
Suenter ina ulteriura ferida ha Vanessa Bolinger prendì distanza dal sport da prestaziun. Ensemen cun sia sora ha ella fatg in viadi dal mund. Durant quel temp è puspè creschì il giavisch da turnar sin il glatsch. Via ses anteriur trenader è ella vegnida sin l’equipa dal Cdh Engiadina. Suenter che Mario Siegenthaler aveva terminà la stagiun vargada sia carriera era l’equipa da l’Engiadina Bassa a la tschertga dad in nov goli. Cun Vanessa Bolinger ha l’equipa chattà quest nov goli.