Siglir tar il cuntegn
Inhalt

Hockey regiunal EHC Arosa: Ferma stagiun, malgrà la pitra terrada en il final

Il EHC Arosa ha era pers il terz gieu da la seria da final da la emprima liga da la Svizra orientala. Ils Grischuns han pers il gieu encunter Wetzikon cun 2:5 ed uschia la seria cun 0:3. Tuttina astga l’equipa d’Arosa mirar enavos sin ina buna stagiun.

Livio Roner è dretg sin la fotografia
Legenda: Livio Roner (dretg) è stà il topscorer d'Arosa durant ils playoffs. MAD

En il final encunter Wetzikon n’è Arosa betg vegni da tegnair dal tut pitg agl adversari dal chantun Turitg. La trumpada ch’ins haja betg pudì gudagnar il final, saja gronda, conceda l’attatgader engiadinais, Livio Roner.

Tuttina po il club da tradiziun mirar enavos cuntent sin la stagiun 2017/2018. En ina u duas emnas vegnan ins a guardar enavos pli positiv sin la stagiun. Las prestaziun en ils playoffs sajan numnadamain stadas fitg bunas.

Livio Roner - Il topscorer d’Arosa en ils playoffs

Livio Roner ch’hà dà sia emprima stagiun en il tricot d’Arosa ha persvadi en ils playoffs. En 11 gieus ha il giuven da 25 onns sajettà 7 gols e dà 7 assists.

Gudagnar il buccal fiss stà pli bel che dad esser topscorer da l'equipa.
Autur: Livio RonerAttatgader dal EHC Arosa

Uschia è el stà il topscorer da ses team. «Quai saja bel, ma i fiss stà pli bel d’avair in buccal enta maun.» In success cun l’equipa dumbri adina dapli, che il success persunal.