Il nov president dal Cdh Engiadina ha num sco spetgà Ruedi Haller. Haller era vegnì proponì da la suprastanza dal Cdh Engiadina sco successur da Domenic Toutsch. La radunanza generala ha tschernì Ruedi Haller unanimamain. Ruedi Haller è il directur dal Parc Naziunal Svizer. Fin uss era el vicepresident dal Club da hockey d’Engiadina e schef tecnic da las equipas da juniors. Ina da las finamiras da Ruedi Haller sco nov president dal Cdh è da cuntinuar cun la lavur da collavuraziun si il sectur da juniors tranter las equipas da hockey en il Grischun dal sid, ed era dad empruvar da pussibilitar en il futur hockey da segunda liga en Engiadina Bassa.
Quatter onns è Domenic Toutsch da Zernez stà president dal Club da hockey d’Engiadina. Suenter che Marco Ritzmann era vegnì tschernì sco president da Grischun hockey, ha il pur e manader d’ina filiala da cassa da malsauns a Zernez surprendì quest uffizi «ad interim». Or dals in u dus onns planisads, èn tuttina vegnids quatter onns.
Pudì muventar insatge
Sco president dal CdH Engiadina far la punt tar il HC Zernez – quai era ina da las ideas da Domenic Toutsch. Ed il president partent n'ha betg mo fatg la punt tranter questas duas equipas rivalisantas. Durant ses temp d’uffizi è quai vegnì a la collavuraziun tranter las grondas equipas en l'Engiadina: il CdH ed il EHC San Murezzan, sin basa da juniors. Uschia gidan las duas equipas l'ina l’autra cun giugaders – ed era las autras equipas da l'Engiadina e dal Grischun dal Sid vegnan integradas uschè bain sco pussibel en il il project.
Il positiv da mes temp sco president è segir la collavuraziun cun San Murezzan sin il sectur da giuvenils.
Sper questa collavuraziun è quai adina era gartegià da restar en segunda liga e da betg far il pass en ina liga pli bassa. E per finir è quai er gartegià dad instradar la scola da hockey a Scuol.
Fin avant pacs onns na fiss quai betg stà pussaivel ch'in da Zernez daventa president dal CdH Engiadina.
Sponsurs e donaturs han sustegni il CdH
Ils davos onns n'èn betg stads simpels. Tuttina han l’entira regiun, sponsurs e donaturs, sustegnì il CdH Engiadina. Las entradas èn quasi restadas las medemas. Uschia è quai stà pussaivel da porscher hockey als pli pitschens fin tar ils gronds en l'Engiadina Bassa.
