En la segunda liga ha il Club da Hockey Engiadina gudagnà l'ultim gieu da relegaziun, la partida ordaifer cunter l'EHC Bassersdorf cun 4:2.
Suenter l'emprim terz manava Bassersdorf anc cun 1:0. En il segund terz han Linard Schmidt e Sandro Ritzmann lura tutgà il gol per il club grischun. En il davos terz han lura anc Gudench Camichel e Men Camichel sajettà il terz e quart gol per il Club da Hockey Engiadina.
Gia avant questa partida eri cler ch'il club grischun vegn a terminar la runda da relegaziun sin plazza in ed uschia era a dar la stagiun proxima en la segunda liga da hockey.
En la My Hockey League èn omadus clubs grischuns sa qualifitgads per ils playoffs. Questa saira èn stadas las ultimas partidas da la qualificaziun.
l'EHC Arosa ha pers la partida ordaifer cunter l'EHC Seewen cun 0:1. Il sulet gol da la partida ha sajettà il club dal chantun Sviz en il segund terz, en la 23avla minuta.
L'EHC Cuira ha percunter gudagnà sia partida ordaifer cunter GDT Bellinzona, quai cun 5:0.
En l'emprima liga da hockey sin glatsch ha il club da hockey da Partenz-Signuradi dumagnà il pass en il mezfinal. Il club dal Grischun ha gudagnà la quarta partida da quart-final cunter ils Red Lions Reinach, cun 4:0 e cunquai gudagnà la seria da best of five cun 3 :1.