Ellas datti dapi in mez tschientaner ed ellas èn daventadas ina marca. Las cursas da skis d'uffants dal Grand Prix Migros. Mintga enviern sa participeschan millis d'uffants a las cursas da selecziun ch'èn en diversas regiuns e chantuns. Ils pli svelts sa qualifitgeschan per il final ch'è adina la primavaira nua che total 750 talents van a la partenza. I sa tracta dal pli grond event da cursas da skis d'uffants dal mund. L'enviern passà ha la pandemia da corona cun il lockdown impedì il final che fiss stà en la regiun da skis da Sursaissa. Las cursas da final han tenor turnus adina lieu en in'autra destinaziun. Per il final 2021 ha Swiss Ski laschà Sursaissa sco organisatur. Cunquai che las mesiras da corona che la Confederaziun ha relaschà, scumondan scadina cursa d'uffants fin 16 onns, ha Swiss Ski avant paucs dis stuì annullar era tut las cursas per quest enviern ed uschia era il final 2021.
Claudio Collenberg, che presidiescha il club da skis da Sursaissa e ch'è a la testa da l'organisaziun dal final, deplorescha fitg. Era sch'el ha gì fin l'ultim la speranza. In tal event saja unic. Da star mal saja surtut per ils massa uffants che na possian puspè betg sa mesirar en il final da quellas cursas naziunalas che survegnan adina gronda attenziun. Claudio Collenberg sa regorda era da ses pli emprim final, cura ch'el era in buob dad 11 onns. Quai saja stà da nar. Cuntanscher il final saja per blers uffants in stausch da motivaziun che laschia dapli che be siemiar d'ina carriera da skiunz. La via da Claudio Collenberg è dal reminent ida fin en la Cuppa mundiala.
A Sursaissa han ins entant miss bain en salv il concept organisatoric e spera cun la bainvulientscha da Swiss Ski, ch'ins possia prender quel ord il truclet e survegnir anc ina giada la schanza sco organisaturs 2022.