Festa da lutga a Flem - nagina tema da la plievgia

Per la 7avla giada è la festa da lutga grischun-glarunaisa a Flem. Tranter 2’000 e 2’500 aspectaturs vegnan spetgads – tut tenor l’aura. Las prognosas n’èn betg bunas, tuttina restan ils organisaturs calms ed optimistics. Ils lutgaders ed ils fans da lutga na laschian betg starmentar da la plievgia.

areal da la festa da lutga a Flem

Legenda da maletgs: Avunda plaz per star a sitg ha igl sin igl areal da la festa da lutga. RTR, U. Lechmann

Per ils aspectaturs saja la plievgia nagin problem, manegia Hanspeter Buchli. Ils fans fidaivels dal sport da lutga na laschian betg starmentar da l’aura. Cun purtar bun resti vegnian quels era sch’igl plova, manegia igl anteriur lutgader. Plinavant hajan els procurà per bler plazs sitgs en las 2 tendas. Supplementarmain vegnan els a cuvrir las vias principalas sin igl areal cun zinslas da lain, per ch’igl na dettia nagina lozza.

«  Als vairs aspectaturs da lutga na fa in zic plievgia nagut. »

Hanspeter Buchli
commember comité d'organisaziun

Era per ils lutgaders na saja l’aura nagin problem. Impurtant saja sulettamain, ch’ils lutgaders na stoppian betg star tranter las lutgas en il fraid ni bletsch. A Flem han els la pussaivladad da sa preparar sin la proxima lutga en las localitads da la scola, ch’è gist sper l'areal da festa.

La festa da lutga grischun-glarunaisa a Flem è dumengia, ils 12 da zercladur 2016. Las emprimas lutgas èn da las 08:00, la davosa lutga (Schlussgang) vegn ad esser enturn las 17:00. Il Radio Rumantsch è era da la partida e rapporta direct da Flem en ils Sportissimos suenter las 12 e suenter las 17.