Siglir tar il cuntegn
cuntegn

Regiunal Fabiana Wieser è pronta per il campiunadi mundial U23

La passlungista da Sent sa participescha per la segunda giada ad in campiunadi mundial da passlung.

Fabiana Wieser, passlungista
Legenda: Fabiana Wieser, passlungista RTR / Reto Mayer

Fabiana Wieser da Sent è ina da set passlungistas e passlungists engiadinais che sa participeschan al campiunadi mundial da juniors, respectiv en la gruppa U23. La passlungista da 21 onns è sa qualifitgada per il campiunadi mundial suenter ch'ella ha mussà bunas prestaziuns al principi da la stagiun: En il lieu dals proxim campiunadi mundial, vul dir en il Goms, è Fabiana Wieser ina giada vegnida terza, ed ina giada vegnida quarta durant questa stagiun.

Cun buns sentiments al campiunadi mundial

Suenter ina buna partenza a l'entschatta da la stagiun da FIS è Fabiana Wieser vegnida bittada in zichel enavos. Sur Nadal e Bumaun ha ella gì la grippa e silsuenter ha la passlungista era anc stuì cumbatter cun in virus. Uss è la giuvna atleta puspè guarida e da buna speranza per participar al campiunadi mundial U23.

Emprimas experientschas tar eveniment grond en Rumenia

Per Wieser n'èsi betg l'emprim campiunadi mundial da passlung. Avant dus onns è ella partida en la Rumenia – sco juniora. Las experientschas ch’ella ha fatg là pon questa giada forsa gidar. L'avantatg principal è dentant il fatg ch'il campiunadi mundial è questa giada en Svizra en il Vallais sin ina loipa che las atletas ed ils atlets Svizzers enconuschan sco l’atgna giaglioffa.

RR sportissimo 17:00