Trais dis, trais etappas cun il mountainbike. Il Engadin Bike Giro ha gì lieu la fin d’emna passada sut circumstanzas spezialas. Pervia dal coronavirus han ils organisaturs stuì elavurar in concept da segirezza.
Quel ha stipulà las differentas reglas. Igiena, tegnair distanza e nua che quai n'è betg pussaivel purtar ina mascra. Vitiers han ins stuì publitgar las persunalias per pudair reconstruir ina eventuala chadaina d'infecziun.
Quasi gia s’endisà vi da la nova situaziun
Il pli spezial durant ils trais dis da cursa e segir stà il fatg, che las curriduras ed ils curridurs han stuì purtar ina mascra avant la cursa en il bloc da partenza. Era suenter la cursa ha ins vis inqual participant cun mascra. Quai na ha insumma betg disturbà. Tuts eran simplamain mo cuntents ch'i ha insumma puspè ina giada dà ina cursa.
