Il basegn saja grond d’astgar avrir il center da fitness, ina giada da la vart finanziala e da l’auter maun per ils clients che dovran il fitness per rinforzar lur sistem d’immunitad u per quels che dovran ils apparats, perquai ch’i han problems da sanadad sco mal la schanuglia u il dies, di Eder Lala che maina dapi il 2018 il center da fitness a Tusaun. Il scumond dal Cussegl federal saja stà ina pulita bastunada per els ed anc bleras autras fatschentas, di Eder vinavant.
In emprim pass
Ils centers da fitness ston dentant tegnair en bain inqual regla da segirtad. Tranter auter sto mintga apparat vegnir dischinfectà mintga giada ch’insatgi ha duvrà quel. Plinavant sto vegnir tegnì en ils dus meters distanza.
Durant ch’il center saja stà serrà ils davos bun dus mais, sajan els stà en contact cun lur clientella a moda virtuala, tranter auter sur in chanal da youtube. Uschia hajan els pudì mussar intgins exercizis che mintgin haja pudì far a chasa. El speria dentant, che tut vegni puspè uschia sco avant la crisa da corona, di Eder Lala.