Gist dus gronds giubileums datti quests dis a Schlarigna. La Societad da gimnastica datti gia dapi passa 100 onns. Pervia da la pandemia da corona han ins dentant decidì da festivar il giubileum a chaschun dal 75avel da la cursa «A travers Schlarigna». Dapi ils onns 40 da l’ultim tschientaner ha quella cursa lieu. Ella è cun quai ina da las veglias cursas da currer en il chantun Grischun, e forsa in zichel er la mamma da tut las cursas da currer ch'i dat en il fratemp sin piz e vals en l’entir Grischun.
Giubileum spustà
Il giubileum da la Societad da gimnastica avess stuì avair lieu l’onn 2020. Pervia da la pandemia da corona è quel giubileum dentant vegnì spustà. Uschia datti uss ina gronda festa cun la cursa che la Societad da gimnastica organisescha, la cursa «A travers Schlarigna». La cursa sa drizza ad uffants e giuvenils che san far part a la cursa er en il team cun ils geniturs u cun creschids. Pervia che la cursa da tradiziun ha era stuì sbatter cun cifras pli pitschnas ha ins midà in pau il concept. La partenza e l’arrivada da la cursa n'èn betg pli sin la plazza dal vitg, mabain sin l’areal da la sala polivalenta. Ultra da quai ha ins cumplettà las cursas da currer cun pensums che las participantas ed il participants han da far.
Cursa «A travers Schlarigna» anc adina populara
Durant ils megliers onns da la cursa, ils onns 80, eran passa 200 uffants e creschids a la partenza da la cursa. Oz na vegnan betg pli tantas curriduras e curridurs a participar a la cursa. L’eveniment è dentant anc adina popular. E per la Societad da gimnastica Schlarigna, la societad che organisescha la cursa, anc adina la meglra reclama per futuras gimnastas u gimnasts.
