Siglir tar il cuntegn
Inhalt

Sport regiunal Domat da return en la 2. liga da ballape

Meglier vess gnanc in reschissur da Hollywood pudì inscenar il return dal Club da ballape da Domat en la secunda liga regiunala: Domat ha realisà la promoziun gia ina runda avant la fin cun ina bella victoria da 4:1 encunter il davos concurrent Landquart-Signuradi.

Club da ballape Domat
Legenda: Il Club da ballape Domat è da return en la 2. liga MAD

Meglier vess gnanc in reschissur da Hollywood pudì inscenar il return dal Club da ballape da Domat en la secunda liga regiunala.

Domat ha realisà la promoziun gia ina runda avant la fin cun ina bella victoria da 4:1 encunter il davos concurrent Landquart-Signuradi.

Mess il fundament gia l’atun

Gia suenter la runda d’atun era Domat sin buna via a la promoziun. La primavaira han lura intginas blessuras franà in pau l’equipa. Plinavant sajan els era stà in pau sut squitsch e gnervus admetta il president e trenader Walter Frizzoni.

2. liga na sa chapescha betg da sasez

Per in club grischun na sa chapeschi quai betg da sasez da pudair dar en la 2. liga e da restar là di Frizzoni. Quai haja ins vis tar Schluein Glion ch’ha gist stuì magunar la relegaziun.

Per restar en 2. liga giavischass il trenader anc in ni l’auter rinforz. Quai saja dentant grev cunquai ch’il dumber da buns giugaders grischuns saja limità.

RR Sportissimo 17:20