Siglir tar il cuntegn
Inhalt

Regiunal Diagonela: Victorias Norvegiaisas e Svedaisas

Tord Asle Gjerdalen e Britta Johansson Norgren gudognan La Diagonela a Zuoz.

Podest

  • 1. Tord Asle Gjerdalen
  • 2. Ilya Chernousov
  • 3. Anders Aukland

Tord Asle Gjerdalen da la Norvegia gudogna la tschintgavla ediziun da la cursa da passlung La Diagonela a Zuoz. Gjerdalen gudogna la cursa sur 65 kilometers en stil classic avant il defensur dal titel Ilya Chernousov. Terz vegn Anders Aukland er da la Norvegia.

Favurits gudognan

Gia davent da l'entschatta eran ils favurits a la testa da la cursa. Curt avant l’arrivada a Zuoz s'ha ina gruppa da tschintg curridurs lura savì distatgar da la concurrenza e far ora tranter els la victoria da la cursa. Tord Asle Gjerdalen ha gì las meglras chommas ed ha gudagnà la cursa cun set secundas avantatg avant Ilya Chernousouv ch'aveva gudagnà la cursa l’onn passà.

L’anteriur curridur da la cuppa mundiala da passlung Curdin Perl ha terminà La Diagonela sco meglier Svizzer. Il passlungist da Puntraschigna ha terminà la cursa 22 minutas suenter il victur ed è arrivà sco 46avel.

Podest dunnas

  • 1. Johansson Norgren
  • 2. Lina Korsgren
  • 3. Katerina Smutna

Tar las dunnas ha gudagnà la Svedaisa Johansson Norgren avant sia cumpatriota Lina Korsgren e Katerina Smutna da la Tschechia.

La cursa ha per l'emprima giada savì vegnir manada sin il traject original: da Zuoz – Schlarigna – San Murezzan – Puntraschigna – Zuoz.

Victoria indigena tar La Pachifica

Victorias indigenas hai da tar las cursas da 30 kilometers, La Pachifica. Yanik Pauchard da Madulain ha gudagnà la cursa tar ils umens, Jogscha Aberhalden da Zernez la cursa tar las dunnas.

RR novitads 14:00