Sco che Dario Cologna ha scrit la gievgia saira sin ses chanals socialas na possia el betg participar al maraton da Londra. La raschun saja ina blessura vid in muscul da la coissa. El saja trist, giaja dentant tuttina a Londra per guardar la citad.
Dario Cologna, quatter-dubel campiun olimpic da passlung, fiss partì la dumengia, ils 2 d’october, al maraton da Londra. Quest giavisch d’ina gia currer in maraton ha il sportist da 36 onns gia gì durant sia carriera activa sco passlungist.
I ha gia daditg cutizzà mai da currer ina giada en mia vita in maraton.
Paucs mais suenter ch’el è sa retratg dal sport da prestaziun e terminà sia carriera vuleva Cologna gia puspè far serius. Cun radund 45’000 participants vuleva el currer ils 42,195 kilometers tras la metropola da Londra. Quest project è naschì cura che Cologna è daventà il zercladur ambassadur d’in producent d’artitgels da sport.
La finamira era da currer sut 2:30 uras
Dario Cologna n’è betg pli profi, ma el resta in sportist ambiziunà. Sia finamira era da currer il maraton da Londra sut duas uras e mesa. Quai han da passa 21’000 curriders dumagnà be 87 avant in onn. Questa finamira na saja però betg pli realistica damai che la preparaziun na saja betg stada ideala, uschia il Jauer. Sco gia en ses davos onns sco passlungist ha Cologna problems cun las chommas, concret cun in ventrigl. Qua na gidan il mument er betg ils tips da l’anteriur campiun d’Europa Viktor Röthlin.
Quai es per mai insatge nov, sin quai ma legrel era. Da currer tras ina tala citad sco Londra cun ina buna atmosfera, quai è franc ina coola chaussa.
Il campiun mundial e campiun olimpic da passlung n’ha betg mess la chommas ad aut suenter sia carriera. El ha trenà vinavant, betg en quella intensitad sco avant, ma tuttina saja el stà bler cun velo ed a currer ed el haja er trenà regularmain forza, di Dario Cologna. Sia finamira saja e restia da currer ina giada in maraton spert, vul dir sut questa marca da 2:30 uras. Sche quai na gartegia betg quest onn a Londra lura forsa en in u dus onns.
