Siglir tar il cuntegn

Header

cuntegn

Regiunal Dar tennis sut in ballun d'aria a Glion

Pudair dar tennis er durant l'enviern. Quai vul la «Surselva Indoor Tennis» ch'è vegnida fundada dacurt. L'idea è da realisar in ballun d'aria sur dus dals trais plazs a Glion-Fontanivas.

Pudair dar tennis era d'enviern en la regiun da Glion e conturn è in vegl giavisch. Avant onns hai gia dà ina IG-Tennis en Surselva ch'aveva perfin elavurà plans per ina halla da tennis. Bajegiar ina halla stabla n'è però ord pliras raschuns betg realistic. Uss ha ina gruppa d'iniziants, ch'han dacurt fundà la «Surselva Indoor Tennis», laschà inspirà dal tempel da tennis sut in ballun d'aria ch'ils da Domat han realisà.

Dar tennis sin sablun durant l'enviern

L'idea dals iniziants enturn Rafael Rensch (vicepresident dal TC Glion) è da metter dus dals trais plazs da sablun existents a Glion Fontanivas sut in ballun d'aria. Sche quella purschida vegniss insumma duvrada han ins sondà tar ils clubs da tennis davent da Sedrun fin a Trin. La suletta halla da tennis en Surselva è en la Cadi, a Mustér, cun dus plazs. La proxima pussaivladad è il ballun d'aria a Domat e las hallas da tennis a Cuira ed ad Untervaz.

audio
Dar tennis d'enviern en Surselva sut in ballun d'aria
ord Sportissimo dals 10.11.2019.
laschar ir. Durada: 4 minutas 59 Secundas.

L'enviern 2020 pudair giugar tennis a Glion

Bler è anc da sclerir, surtut era la dumonda da la finanziaziun. Plinavant dovri era la lubientscha da bajegiar da la vischnanca d'Ilanz/Glion. La «Surselva Indoor Tennis» è motivada e vul festinar cun sclerir e sondar e retschaiver la lubientscha ed ha mess a sa sezza la finamira da pudair dar tennis sut il ballun d'aria a partir da l'october 2020.

RR Sportissimo 12:00

Artitgels legids il pli savens