Siglir tar il cuntegn
Inhalt

Regiunal Da Tumein en ils Stadis Unids – ina giuvna fa tut per il ballape

Ella è gia stada campiunessa svizra da las junioras cun l’equipa dals Grasshoppers, sia finamira è da giugar ina giada cun l’equipa naziunala svizra. Gianna Klucker (18) da Tumein fa bler per sia carriera da ballape, dentant era per la scolaziun. Ella è ida per 9 mais en ils Stadis Unids.

Gianna Klucker cun sias collegas da l'universitad da Caldwell.
Legenda: Gianna Klucker cun sias collegas da l'universitad da Caldwell. mad

A Caldwell ha ella frequentà l’universitad da Caldwell, nua ch’ella ha pudì cumbinar bain ils studis da la scienza da sanadad cun il ballape. Per ella ina chaschun ideala. A l’universitad da Caldwell ha Gianna Klucker pudì cumbinar sia gronda passiun, il ballape, cun la scolaziun. Pertge sia gronda passiun è il ballape, ma era sin la scolaziun dat ella gronda paisa.

Igl era simplamain super en tut!
Autur: Gianna KluckerGiugadra da ballape

A l'universitad ha ella pudì dar ballape quasi mintgadi. Quai è sa chapescha fitg bel, sch’ins po viver ora l’atgna passiun uschè intensiv. Ma igl è era pretensius dad esser l'entir di en scola e lura anc ir a trenar mintga di.

Vitiers vegn ch’ils trenaments èn pli fadius ch’en Svizra perquai ch’i vegn mess en ils Stadis Unids dapli paisa sin la fitness. Ma tuttina hai plaschì a la giuvna da Tumein a l’universitad da Caldwell.

Il trenament è pli fisics ed ins curra dapli senza il bal che qua tar nus en Svizra.

Tant ils trenaments, ils gieus e l’equipa han plaschì a Gianna Klucker, ma era la scola. Uschia ch’ella vul uss mo restar 3 mais a chasa e mez avust gia puspè ir a Caldwell. Quella giada vul ella restar bun 4 mais e lura turnar a Tumein vers Nadal.

En il futur pudess jau schon metter avant da giugar ballape professiunalmain.

La finamira da Gianna Klucker è clera, ella vul in di giugar en l’equipa naziunala Svizra. Ma era da pudair giugar ina giada sco profi en l'exteriur è in siemi, ni meglier detg ina finamira, da la giuvna rumantscha.