L’amulain da hockey ha Florian Haller emprais tar il HC Zernez ed il Cdh Engiadina. Dapi ch'el ha nov onns è Florian Haller goli da hockey. L’emprim viadi ha el fatg cun 14 onns a Tavau, nua ch'il giuven engiadinais ha dà en tut las partiziuns da juniors - sco ultim en la squadra d’elita ch'è avanzada la primavaira fin en il mez final dals playoffs. Florian Haller è alura er stà nominà per intginas partidas da playoff dal HCD.
Pass en il hockey dad umens tar Arosa
Suenter la fin dals campiunadis da hockey da primavaira ha Florian Haller tschertgà ina nova sfida. El è sa decidì per l'EHC Arosa e per la My Hockey League. En la terz auta liga da hockey svizra vul il giuven sportist empruvar da far il pass en il hockey dad umens. L’entschatta cun l'EHC Arosa è grategiada. L’equipa dal Scanvetg ha gudagnà fin uss tut las partidas da la Cuppa svizra, dentant er tut las partidas dal campiunadi da la My Hockey League.
Vegni acceptà fitg bain da sia nova equipa
Las ambiziuns da l'EHC Arosa èn grondas. Gia avant insaquants onns aveva la squadra da tradiziun fatg la dumonda da promoziun en la Swiss League, quai è la segund auta liga da hockey en Svizra. Economicamain duai quai esser pussaivel, sportivamain n'è quai dentant anc betg grategià. La squadra dal trenader Rolf Schrepfer ha dentant puspè investi en nov giugaders. In da quels è era Florian Haller dad Ardez. Il nov goli da l'EHC Arosa lauda la professiunalitad e la qualitad en sia nova equipa, sco era il bun spiert d’equipa.
