Quai ch'il Passlung da Martina a Scuol è d’enviern, è la cursa da stad da l’Engiadina Bassa durant ils mais pli chauds. Omaduas cursas han ina lunga tradiziun ed èn part da l’onn sportiv en Engiadina Bassa. Sco la cursa da passlung, il Passlung da Martina a Scuol, ha er la cursa da stad da l’Engiadina Bassa stuì ir durant tut quests onns tras auts e bass. Mo ina giada n'ha la cursa dentant betg gì lieu. L’onn passà è la cursa vegnida stritgada pervia da la pandemia da corona.
Corona ha dà temp per midaments
Il temp senza cursa da stad han ils organisaturs duvrà per in qual midament. Nov è uss Sandy Trottmann la presidenta da la cursa, e nov èn per exempel er las cursas nua cha mamma ed uffant, u lura bab ed uffant pon currer ensemen la cursa da stad.
Senza certificat, dentant cun blocs da partenza limitads
Cura ch'ils organisaturs da la cursa da stad da l’Engiadina Bassa han decidi da far la cursa n'eran las reglas da ‘3G’ anc betg uschè derasadas. Vul dir, far part ad in'occurrenza sch'ins è vaccinà, u lura cun in test negativ, u sch'ins è guari da Covid. Perquai han ins decidì da sa tegnair vi dal concept oriund, e da far la cursa cun resguardar las mesiras da segirezza en connex cun Covid. Per la cursa da stad da l’Engiadina Bassa vul quai dir ch'ins po far part senza certificat a la cursa, ins ha dentant da tegnair en la distanza, a la partenza han ins da purtar ina mascra, ed en ils blocs da partenza pon maximalmain 15 curriduras e curridurs esser il medem mument.