Il passlunghist Curdin Perl è parti sco grond favurit da la cursa La Sfida en Engiadina. La cursa da pliras etappas è in mini tour de ski cun in prolog e duas etappas da distanza. L’emprima etappa a Puntraschigna ha il matador local gudagnà avant Marco Rogantini da San Murezzan e Kevin Camathias da Sagogn.
Midament a la testa suenter la segunda etappa
Suenter la segunda etappa, ina etappa sur 12 kilometers cun partenza da massa è nov Marco Rogantini a la testa dal classament general da la cursa La Sfida. Grazia a las secundas da bonus ha Rogantini surtut la testa da la tabella da Curdin Perl. Il passlunghist indigen perda 17 secundas ed è per il mument terz. Segund cun in retard dad 8 secundas sin Rogantini e Kevin Camathias da Sagogn.
Final sin la pista dal runal Äla a Malögia
Dumengia spetga lura la davosa ed ultima etappa dal mini tour de ski en Engiadina. L’etappa sur 15 kilometers persecuziun cun l’ascensiun finala si da la pista dal runal Äla a Malögia. Il favurit Curdin Perl parta cun 17 secundas retard sin il leader da La Sfida Marco Rogantini.
Tar las dunnas è per il mument Valentina Kreienbühl da Rüti a la testa. Segunda cun in retard da gia 3:12 minutas è Seraina Stecher da Claustra e terza Simone Bürgler.
RR Sportissimo 17:00