Ils frars èn per l'emprima giada adversaris sin il plaz. Fabrizio Cavegn, il frar pli giuven, porta cun luschezza il tricot dal FC Vaduz – fertant che ses frar pli vegl, Marino Cavegn, defenda las colurs dal FC Balzers. Sin la plazza da ballape enconuschan els las fermezzas d'in l'auter.
Mes frar è offensiv fitg ferm. El n’è strusch da tegnair.
Mes frar curra fitg, el curra sc’in chaval e n'ha nagina fin.
E cun questa savida sa rimnan els a Balzers sin il plaz da ballape. Il vent sufla sur il plaz verd, igl è fraid ed i plova sco cun sadellas giu dal tschiel – mo per ils frars Cavegn quinta mo in, il gieu e la victoria. L'entira famiglia è sa rimnada per vesair il derby. I n'è betg mo in di spezial per ils dus frars ed ils geniturs, era per la sora pitschna Chiara Lorena Cavegn sa tracti d'in di extraordinari.
Plain luschezza vegnan ils dus Cavegns da Vella sin il plaz. Suenter l'applaus s'embratschan els, e giavischan bler cletg in a l'auter. Marino per Balzers cun il numer 27, e Fabrizio per Vaduz cun il numer 23.
Co il gieu è stà
Il gieu va liber ed ils Cavegns dattan tut. Marino sin l'ala dretga e Fabrizio sco attatgader. Ditg vegn Balzers a tegnair pitg a Vaduz. Marino curra da la lingia si e giu e cumbatta per mintga balla, entant che Fabrizio fa squitsch enavant ed emprova da far in gol. Tar intginas scenas sa scuntran els sin il plaz. I vegn cumbattì e lura capiti, l'emprim gol per Vaduz. Ma per Marino n'è anc nagut a fin. La schanza da gudagnar cunter ses frar pitschen n'è era betg anc dada en l'aua da la pausa. Cun 1:0 suenter 45 minutas è tut anc avert.
Fabrizio è fieu e flomma davanttiers e vul exnum far in gol. El curra en la zona da penalti e l'adversari al metta ina chomma – foul, penalti. Fabrizio metta la balla sin il punct, prenda schlantsch e stauscha cun persvasiun la balla en il latsch dretg. Curt suenter vegn Fabrizio midà ora. Ses frar Marino cumbatta vinavant. Deplorablamain betg pli cunter ses frar. Entant na pon ils da FC Balzers betg tegnair il tempo da Vaduz, e perdan il gieu cun 5:0. In gieu che resta ad els omadus bain en memoria.
L'emprima e «forsa» l'ultima giada èn ils dus frars Fabrizio e Marino Cavegn stads adversaris sin il plaz da ballape. Il victur era questa giada Fabrizio Cavegn. Tgi sa sch'i dat ina revantscha nua che ses frar grond survegn la schanza da reussir cunter el.
