Siglir tar il cuntegn

Regiunal Cuira e Schluein Glion cun cleras finamiras

La balla rolla puspè sin las plazzas da ballape en il Grischun. Suenter ina lunga pausa d’enviern cumenza la runda da primavaira, tranter auter er per ils dus actual megliers clubs grischuns, Cuira 97 e l’US Schluein Glion.

Cuira 97 e Schluein Glion dattan en la segunda liga regiunal. Ed omadus clubs han ina clera finamira per questa segunda mesadad dal campiunadi. Il club da Cuira vul tant pli spert puspè turnar enavos en ina liga pli auta ed il club Sursilvan vul mitschar da la relegaziun.

Cuira 97 parta sco leader e favurit

In emprim pass direcziun ina liga pli auta, la segunda liga interregiunala, ha Cuira gia fatg en la runda d’atun. L’equipa da Thomas Waser ha pers là sulet in dad 11 gieus e sa chatta il mument a la testa da la tabella cun in avantatg da 5 puncts sin la concurrenza. Suenter onns da miseria cun bleras midadas da persunal e blessuras para la spirala negativa dad esser sa fermada tar Cuira. Cun in’equipa giuvna e motivada vul l’equipa da la chapitala grischuna cuntinuar sco quai che la runda d’atun è ida a fin.

Schluein Glion ed il cumbat cunter la relegaziun

Tut auter che tar Cuira 97 è la situaziun tar l’US Schluein Glion. Suenter ina buna partenza en il campiunadi èn ils Sursilvans vegnids in zic sut las rodas en questa segunda liga regiunala. Schluein Glion sa chatta be sin il 10avel plaz da la tabella cun tuttina blers puncts sco il club da Rapperswil-Jona ch’è sut il stritg ed uschia sin in plaz da relegaziun. Cun il nov trenader Cyrille Benoit Belinga emprova Schluein Glion da defender questa primavaira il plaz sur il stritg.

In dals puncts culminants, tant per Cuira 97 sco er per l’US Schluein Glion, è lura il derbi grischun dals 16 d’avrigl a Cuira. Quest duel vegn era emess via livestream cun commentari rumantsch sin www.rtr.ch.