Siglir tar il cuntegn
Inhalt

Regiunal Cuira 97 gudogna il derbi a moda dramatica

Cuira 97 è mitschà cun in egl blau en il derbi grischun da ballape en la segunda liga encunter l’US Schluein Glion. Il club da la chapitala, il favurit e leader da la tabella, ha battì l’equipa sursilvana fitg stretg cun 3:2.

Legende: Video Rapport da gieu Cuira 97 - US Schluein Glion abspielen. Laufzeit 05:34 Minuten.
Or da Actualitad video dals 16.04.2016.

Per la decisiun ha Stefan Elmer procurà. Il defensur da Cuira 97 ha sajettà en la 92avla minuta il 3:2, quai cun in sajet da siemi ord bun 18 meters. Grazia a quai gol ha Cuira salvà a chasa ils trais puncts budgetads.

Duscha fraida per Schluein Glion strusch ch’il gieu ha cumenzà

Il gieu aveva gia cumenzà optimal per Cuira 97, l’equipa che vegn trenada da Thomas Waser. Gia en la segunda minuta ha Enes Salihagic sajettà il 1:0 suenter in culp liber. Schluein Glion ha duvrà intginas minutas per chattar la via en il gieu. En la 38avla minuta grategi dentant a Tiziano Vinzens d'egualisar agl 1:1, quai suenter in solo tras l’entira defensiun dals da Cuira. Paucas secundas avant la pausa tucca Enes Salihagic da Cuira be la pitga.

Piz a cup fin la fin

La segunda mesadad cumenza danovamain cun ina duscha fraida per l’US Schluein Glion. Strusch ch’il gieu ha cumenzà sajetta Cuira 97 il 2:1. Suenter ina buna cumbinaziun èsi la finala stà Valerio Plozza ch'ha laschà nagina schanza al goli da Schluein Glion.

Ils Sursilvans na dattan dentant betg si e vegnan sco gia en l’emprima mesadad puspè tar schanzas. En la 75avla minuta vegn Frank Mvogo franà cun in foul avant il gol. L’arbiter mussa immediat sin il punct da penalti. Gabriel Derungs, anteriur giugader da Cuira, surpiglia la responsabladad e tira al 2:2. La finala èsi tuttina ils da Cuira che pon far festa. Cun la davosa acziun dal gieu sajetta Stefan Elmer il 3:2 per l’equipa da la chapitala grischuna.

Cuira sin curs da promoziun – Schluein sto tremblar vinavant

Suenter duas terradas en seria ha Cuira puspè pudì festegiar ina victoria ed uschia defendì l’emprim plaz en la tabella.

Schluein Glion sto da l’auter maun magunar ina dira terrada e tremblar vinavant. Il cumbat encunter la relegaziun cuntinuescha numnadamain per l’equipa da Cyrille Belinga, il trenader dal Camerun.