Gia il matg, anc a l'entschatta da la pandemia da corona, han ils organisaturs dal Bike-Maraton dal Parc Naziunal spustà la cursa sin la mesadad da settember. En Engiadina han ins speculà che las restricziuns da la Confederaziun e dal chantun vegnan schluccadas fin il settember e ch'ina cursa sa lura avair lieu. Ils organisaturs da la cursa da tradiziun han speculà endretg. Cun resguardar il concept da segirezza sa la cursa uss avair lieu.
Cursa cun mascra, distanza e la decleranza d'esser saun
Il Bike-Maraton dal Parc Naziunal vegn questa giada ad esser tut auter. Betg Perquai ch'i dat mo trais cursas sin in traject alternativ e mo en Engiadina, dentant era perquai che las participantas ed ils participants da la cursa han da resguardar il concept da segirezza. Quel prevesa da purtar ina mascra a la partenza, ch'ins resguarda las reglas da distanza e dad igiena e ch'ins suttascriva ina decleranza nua ch’ins è d’accord cun las mesiras da segirezza.
Trais cursas alternativas cun partenzas a Scuol a Zernez ed a S-chanf
Per betg surpassar il maximum da 300 participants per cursa, datti trais cursas. La cursa roiala da 108 km parta a Scuol e va lura sur S-chanf puspè enavos a Scuol. La cursa mesauna parta a Zernez e la cursa curta parta sco usità a S-chanf. Il bike maraton na fa quest onn betg la visita a Livigno. La part dal traject sin territori da l’Italia è vegnì stritgà dal tuttafatg. Il bike maraton 2020 vegn ad avair lieu mo en Engiadina.