Siglir tar il cuntegn
Inhalt

Regiunal Challenge Davos – in nov triatlon alpin a Tavau

Dus vegls amis han realisà in siemi communabel. Il triatlet da classa Sven Riederer e ses trenader da junior Ernst Bromeis organiseschan la Challenge Davos, in triatlon da distanza curta ed in da distanza mesauna a Tavau.

Sven Riederer ed Ernst Bromeis (da sanester)
Legenda: Ils organisaturs da la Challenge Davos enturn Sven Riederer ed Ernst Bromeis (da sanester). RTR / Roger Alig

Ernst Bromeis è enconuschent sco ambassadur da l’aua. En il rom da sia missiun “miracul blau” è el, tranter auter, nudà da la tgina dal Rain fin a la mar. Bromeis è dentant era stà il trenader dal triatlet Sven Riederer. Quai avant che Riederer ha fatg gronda carriera. Il 2004 ha el gudagnà bronz als gieus olimpics d’Athen, l’onn passà ha el prendì part a Rio per la quarta ed ultima giada a gieus olimpics. Riederer è anc adina triatlet, ha dentant midà da la distanza olimpica pli curta sin distanzas lungas e mesaunas. Dasper organisescha el era ina seria da cursas da triatlon svizras.

Las vias da Bromeis e Riederer sa cruschan puspè

En la preparaziun per Rio ha Sven Riederer entupà per casualitad Ernst Bromeis sin las loipas da passlung da Tavau. Ed ils dus amis d’antruras han decidì d’organisar in triatlon a Tavau. Challenge Davos ha quel num ed è ils 16 e 17 da settember. La sonda è in triatlon da la distanza curta, la dumengia in da distanza mesauna da varga 70 kilometers. I vegn nudà en il Lai da Tavau, ì cun velo sin il pass dal Flüela ed enavos respectivamain fin Susch ed enavos e currì enturn il Lai da Tavau. Ultra da quai datti anc cursas encunter l’ura da Tavau fin il pass dal Flüela, quai en las quatter disciplinas currer, inline skate, skis da rodas e velo da cursa. Tar tut las concurrenzas è la via dal pass serrada e stat a disposiziun exclusiva a las sportistas ed als sportists. Insatge ch’i dat mo darar en Svizra.

RR Sportissimo 17:00