Siglir tar il cuntegn

Header

cuntegn

Regiunal CB Scuol – a la cua da la tabella en la pausa d’enviern

Suenter la mesadad dal campiunadi va il club da ballape da Scuol cun mo trais puncts en la pausa d’enviern.

Il logo dal CB Scuol.
Legenda: Il club da ballape Scuol dovra meglra disciplina. mad

En la quarta liga da ballape cumbatta il CB Scuol encunter la relegaziun. Dapi il cumenzament dal campiunadi spetga l’equipa da l’Engiadina Bassa sin l’emprima victoria. Il CB Scuol è cun trais puncts a la cua da la tabella.

Surtut feridas e la disciplina da vegnir en ils trenaments ed a dar ils gieus èn in grond problem. Savens n’aveva l’equipa betg ils indesch giugaders ch’èn necessaris per dar bal. Lura ha l’equipa dà cun mo diesch giugaders. Che quai ha in'influenza sin las prestaziuns da l’equipa è cler.

La disciplina è tar nus in grond tema.
Autur: Lorenzo Derungs capitani CB Scuol
audio
Bunura: Ballape regiunal – Scuol a la cua da la tabella
ord Actualitad dals 02.11.2017.
laschar ir. Durada: 2 minutas 43 Secundas.

Suenter la runda d’atun è il CB Scuol a la cua da la tabella ed uschia sin ina plazza da relegaziun. Durant ils mais d’enviern vul l’equipa lavurar vi da la disciplina ed era vi da la tenuta. Tenor il capitani vul il CB Scuol puspè vegnir ina equipa, nua ch'ils giugaders dattan tut in per l’auter. Sche quai grategia èn las schanzas intactas che il CB Scuol resta en quarta liga.

I na sa betg esser che nus vain dad ir a la tschertga da giugaders. Nus vulain esser in'equipa.
Autur: Lorenzo Derungs capitani CB Scuol

Entant ch'il CB Scuol va en la pausa d’enviern sin la davosa plazza da la quarta liga cumbatta il CB Schlarigna per la testa da la tabella. L’equipa da l’Engiadin'Ota dat il davos gieu da la runda d’atun encunter Tusaun/Cazas. Gudogna Schlarigna terminescha l’equipa la runda d’atun sin l’emprim plaz.

RR actualitad 06:00

Artitgels legids il pli savens