Il Club da ballape Lumnezia dominescha la runda d’atun en la gruppa 2 da la 4. liga. L’equipa dal trenader Giacun Vinzens ha gudagnà 6 dals emprims 7 gieus, per part a moda suverana. Sulet ina giada ha Lumnezia pers. Uschia è la giuvna equipa sa sviluppada al grond favurit per la promoziun en la 3. liga.
La promoziun en la 3. liga en vista
Sche quai gartegiass cun la promoziun en la terza liga, lura fissia quai bun, di Giacun Vinzens. Lura valess quai da far ina emprova. Mo quai na saja betg in’obligaziun, in squitsch u ina finamira absoluta.
Vinzens è oriund da Sagogn ed ha passentà sia carriera da giugader tar l’Uniun sportiva Schluein. Avant ch’el è daventà trenader en la Lumnezia, ha el trenà pliras stagiuns l’Uniun sportiva Danis-Tavanasa, in dals concurrents da Lumnezia.
Sviluppà permanentamain l’equipa
Giacun Vinzens è uss gia la terza stagiun trenader dal CB Lumnezia. Ils emprims dus onns haja el scolà oravant tut la tecnica e la tactica. Quai saja stà necessari, perquai ch’el haja blers giugaders giuvens. Per questa stagiun haja el uss dentant mess dapli paisa sin la cundiziun e la spertadad. Mo il svilup saja sa chapescha mai a fin. Sia giuvna equipa haja anc adina potenzial da sa megliurar, di Vinzens.
RR sportissimo 17:00