Siglir tar il cuntegn

Header

cuntegn

Campiunadi svizzer da curling Victoria per il CC Dübendorf a Schlarigna

Il nov campiun svizzer da curling vegn da Dübendorf. Il CC Dübendorf cun il skip Werner Attinger ha gudagnà il titel tar l’ediziun da giubileum a Schlarigna. En il final ha Dübendorf batti Burgdorf. Meglra equipa indigena è quella dal CC Segl cun skip Filip Niggli. Segl ha batti Samedan.

Maletg dal campiunadi.
Legenda: Las meglras equipas da curling da tut la Svizra èn s'inscuntradas la fin d’emna a Schlarigna. RTR, Roman Dobler

Amez la vischnanca tar il center da sport è vegni cumbatti per il titel dal champiun svizzer. Circa 40 squadras eran da la partida, il titel è ì a Dübendorf cun skip Werner Attinger. En in final plain tensiun ha Dübendorf battì Burgdorf. Per l’emprima giada sa po la squadra numnar campiun svizzer da curling.

Buna prestaziun er da las equipas indigenas

Radund diesch equipas da l’Engiadina han fatg part al campiunadi svizzer da curling. Il grond favurit era l’equipa dal CC Samedan cun skip Daniel Garraux. La squadra ha gia savì festivar sis titels da campiun svizzer – ils davos trais en fila. Samedan ha dentant manchentà dad avanzar fin en il final. Uschia ha la squadra giugà en il final pitschen per la terza plazza. L’adversari en questa partida era il CC Segl Maria cun skip Filip Niggli. Il davos crap ha decidi la partida a favur da Segl. Suenter duas quartas plazzas tar in campiunadi svizzer da curling è la squadra finalmain rangada sin il podest.

Midament da generaziun

Suenter ch'il president Arthur Rüdisühli ha presidià stgars 40 onns il CC Schlarigna Saluver era il campiunadi svizzer in Engiadin'Ota il davos en sia carriera. Cun fatscha cuntenta ha el savì surdar il timun dal CC Schlarigna a ses successur Robin Miozzari.

audio
Bilantscha dal campiunadi svizzer da curling cun Robin Miozzari
ord Sport ed actualitad dals 30.01.2022.
laschar ir. Durada: 2 minutas 10 Secundas.

RTR actualitad 17:30

Artitgels legids il pli savens