La bobera dal ‘Olimpia Bobrun’ da San Murezzan a Schlarigna è il dachasa dal pilot engiadinais Cédric Follador. Qua ha tut cumenzà cun il sport da bob. Follador è entant ina part constanta en la cuppa d’Europa. Sur la segund auta seria da bob mundiala vul il pilot da 27 onns avanzar en la cuppa mundiala. Duas giadas ha Follador gia pudì ir a la partenza en la cuppa mundiala. La 17avla plazza a La Plagne en Frantscha era ses meglier resultat.
Fitgà pe en la cuppa d’Europa
Suenter tschintg onns en la cuppa d’Europa ha Cédric Follador fitgà pe en questa seria da cursas. Anc mai n'ha il pilot engiadinais mussà sur l’entira stagiun uschè constantas e bunas prestaziuns sco quest enviern. Cun il bob a quatter è el daventà ina giada tschintgavel, cun il bob a dus perfin duas giadas quart. Il retard sin ina plazza da podest è pia fitg pitschna.
Terz tar campiunadi svizzer
A la fin dad ina lunga stagiun vegnan anc curunads las reginas ed ils retgs da bob sin livel naziunal. En la pli veglia ed unica bobera natirala da San Murezzan a Schlarigna ha tranter auter gì lieu il campiunadi svizzer cul bob a quatter. Il favurit e victur dad in diplom olimpic Michael Vogt ha gudagnà la concurrenza avant Timo Rohner e Cédric Follardor. La lunga stagiun va pia a fin per Follador cun ina plazza da podest.