La stagiun d'unihoc è uss definitiv a fin tant en la liga naziunala sco era en las ligas d'amaturs. Per ils unihockeyans da Blau-Mellen Cazas na saja la situaziun betg da cumparegliar cun quella dals profis. Quai di Adrian Capatt che fa ses patratgs sco in activ sto sa sentir. Adrian Capatt ha dà bunamain 20 onns en la Liga naziunala A. El è vegnì 4 giadas campiun svizzer cun Alligator Malans ed ha dà numerus gieus per la naziunala svizra d'unihoc. Tar il club d'emprima liga da Blau-Bellan Cazas dat el, ensemen cun numerus anteriurs activs, per plaschair e hobi. Tuttina è il club da la Tumleastga ambiziunà. Il favrer ha Blau-Mellen gudagnà il Liga-Cup. Ed ins avisava il double. Vuleva vegnir per la quarta giada en seria campiun svizzer en emprima liga. La seria da quart-final dals playoffs aveva gist cumenzà ch'il coronavirus ha era franà il mund d'unihoc.
Adrian Capatt conceda ch'el haja l'emprim mai pensà che quai cun il coronavirus survegnia talas dimensiuns. Ils 8 da mars han els dà lur ultim gieu e pensà che en 3 u 4 emnas saja tut passà ed ins possia cuntinuar cun ils playoffs ed eruir ils campiuns svizzers e terminar la stagiun, simplamain in pau pli tard. Vegnì è tut auter. La stagiun è uss definitiv annullada. Campiuns svizzers d'unihoc na datti en naginas ligas. Uschia ch'era Blau-Mellen Cazas sto spustar sia missiun da defender il titel sin la stagiun che vegn.
Cun ils 11 da matg lubescha la Confederaziun ad equipas d'amaturs ed a sports populars da cumenzar cun ils trenaments. Però va quai be cun restricziuns sco per exempel be 5 giugaders sin il plaz e tegnair distanza. Uschia desisti ses club sin quella pussaivladad. Ins haja decidì che mintgin treneschia individual, sco anteriurs da la liga naziunala saja quai nagin problem. Suenter las vacanzas da stad speran ils unihockeyans da Blau-Mellen Cazas da pudair cumenzar cun il trenament en halla.
L'attatgader Adrian Capatt, ch'ha dentant 45 onns, ch'ha marcà il sport d'unihoc en Svizra sur decennis, vesa era il positiv en quest'entira crisa da corona. El crai che la motivaziun e la fom da puspè trenar e gudagnar vegnia ad esser gronda la stagiun che vegn.