Il Bikemaraton dal Parc Naziunal ha ina lunga istorgia da success. La cursa ch'è vegnida manada atras l’onn 2002 per l’emprima giada, è creschida a la pli gronda cursa da mountainbike en Svizra. Entant che autras cursas han stuì ceder durant ils ultims dus decennis, è il maraton dal Parc Naziunal vegni adina pli popular. Actualmain participeschan varga 2'000 sportistas e sportists a la cursa enturn in Parc Naziunal.
Be trais curridurs adina da la partida
Tar ils curridurs che fan persul ina da las quatter differentas cursas enturn il Parc Naziunal èn mo trais che han fatg tut las 18 ediziuns. In da quels è il Jauer David Tschenett da Müstair. Il ciclists da hobi era gia l’onn 2002 tar l’emprima ediziun da la partida. Alura manava quella anc da Sta. Maria a Scuol.
Il maraton è per mai la finamira da mintga stagiun. Uschia sai jau che jau stoss far insatge.
Per il solit la cursa «Jauer» sur 104 kilometers
La pli part da las cursas dal Bikemaraton dal Parc Naziunal ha David Tschenett fatg sin il traject «Jauer». La cursa sur 104 kilometers cun partenza a Fuldera, via Livigno, il Pass da Chaschauna a S-chanf e da là puspè enavos a Scuol. Be ina suletta giada ha il ciclist fatg la cursa roiala da Scuol enturn il Parc Naziunal puspè enavos a Scuol.
RR actualitad 07:00