Sco gia avant in onn han Stünzi tar ils umens e Leugger tar las dunnas battì l’entira concurrenza en la cursa da 40 kilometers cun 1’640 meters differenza d’autezza da Lumbrein sur l’Alp Sezner e l’Alp Nova a Sursaissa ed enturn il Piz Mundaun enavos a Lumbrein.
Michael Stünzi ha gudagnà la cursa dals umens en 1:58.45 uras ed è uschia stà il sulet ch’ha dumagnà la cursa roiala da 40 kilometers sut duas uras. Sco segund cun in retard d’exact trais minutas è Daniel Widmer vegnì. Cumplettà il podest sco terz ha Robin Spiess. Meglier sursilvan è stà Ivan Demont da Vella sco 13avel en 2:12.13 uras.
Tar las dunnas ha Seraina Leugger gudagnà en 2:30.18 uras. Segunda cun strusch duas minutas retard è vegnida Carla Solèr da Lumbrein. Cumplettà il podest sco terza ha Eliane Müggler da Thal en il chantun Son Gagl.
Rangaziun 2019
In di da cursa perfetg
Aura perfetga, ina bella culissa e radund 300 participantas e participants, da quai passa 200 ch’èn stads a la partenza a la cursa roiala sur 40 kilometers. Giusep Capeder, president dal comité d’organisaziun, tira cunquai ina bilantscha fitg positiva e sa legra gia sin l’ediziun 2020 nua ch’il Bike Maraton Lumnezia-Sursaissa po festivar il giubileum da 30 onns.
E malgrà che blers ferms mountainbikers indigens sco Vital Albin, Ursin Spescha u Andrin Beeli n’han betg pudì sa participar a la cursa da quest onn èn stads a la partenza uschè blers participants sco dapi intgins onns betg pli.
RR sportissimo