Siglir tar il cuntegn

Header

Navigaziun

cuntegn

Regiunal Biatletas e biatlet dal Grischun èn pronts per la nova stagiun

Selina Gasparin e Serafin Wiestner èn ils dus leaders grischuns en la nova stagiun da biatlon. Cun ambiziuns partan era Elisa ed Aita Gasparin ed Irène Cadurisch.

La piuniera da biatlon Selina Gasparin è anc adina la pli ferma svizra. Gia en l’emprima stagiun suenter ch’ella è vegnida mamma è ella puspè stada sin il podest en la cuppa mundiala. En questa stagiun vul la veglia da las trais soras Gasparin vegnir pli constanta e cumbatter pli savens per las emprimas posiziuns.

Da l’Engiadina a Lai e Lantsch

Per avair meglras cundiziuns da trenar han las trais soras Gasparin bandunà l’Engiadina ed èn sa chasadas en la vischinanza da la nova Arena da biatlon a Lantsch. La giuvna Aita viva uss a Lai, Selina ed Elisa a Lantsch.

Là san ellas profitar da l’infrastructura perfetga che l’Arena da biatlon porscha da stad e d’enviern. Sco quarta grischuna emprova Irène Cadurisch dad Isola da fitgar pè en la cuppa mundiala suenter ina lunga pausa da blessura.

Serafin Wiestner è avanzà ad ina pitga da l’equipa svizra

Il sulet um grischun che parta per il mument en la cuppa mundiala da biatlon è Serafin Wiestner da Trin. Er el trenescha savens a Lai. Decisiv per far in ulteriur pass enavant ha el oravant tut lavurà intensiv en il tir.

RR Sportissimo 17:00