Siglir tar il cuntegn
Inhalt

Regiunal Belinga è il nov trenader da l'US Schluein

Per la runda da primavaira ha il club da bal US Schluein pladì il trenader Cyrille Belinga dal Camerun. Belinga ha lavurà fin ussa sco trenader da giuvens dal Grasshoppers Club a Turitg. L'US Schluein ha plinavant dà enconuschent pliras partenzas ed entradas.

Cyrille Belinda (Camerun) dat il maun a Simon Lutz
Legenda: Cyrille Belinga (sanester) ed il president da l'US Schluein, Simon Lutz mad

L'um da 31 onns dal Camerun è vegnì l'onn 2000 sco ballapedist da professiun tar l'FCZ. Là n'ha el dentant betg giu il success cumplain. Il 2005 ha el midà tar l'FC Küsnacht, pli tard en l'Ungaria avant ch'el è turnà en Svizra. El ha giugà en pliras equipas da l'emprima liga. Belinga discura tudestg e franzos. El survegn sco ses trenader assistent David Caduff che ha trenà fin ussa l'equipa da la quarta liga da Schluein. Belinga succeda a Corsin Cavegn ch'è ha da sia vart surpiglià l'atun la successiun da Urs Casutt.

Partenzas ed entradas

Cun Gabriel Derungs ha l'US Schluein pladì in giugader dal center cun gronda experientscha. Derungs ha giugà cun Cuira 97 en l'emprima e la segunda liga, e sco ultim tar l'equipa da Cuira 97 II en la terza liga. Ulteriuras entradas èn Gion Andrea Nay da Trun e Rawin Monn da Sedrun. L'US Schluein sto dentant era laschar partir dus giugaders, Carlo Bearth e Ramon Arpagaus. Sco schef da sport agescha er en l'avegnir Eros Bonolini. El è stà l'assistent da Corsin Cavegn.

RR novitads 17:00